المصري كيدز.. حدوتة: «القرد المشاكس»

0 تعليق 22 ارسل طباعة تبليغ

اشترك لتصلك أهم الأخبار

فى جبلاية القرود كان بيعيش القرد مشمش وكان دايما متحمس وبيحب يعمل مغامرات، وعلى طول الشقاوة مش سايباه.. كان يصحى الصبح كله نشاط، يجرى يلعب هنا وهناك. وكان له أصحاب كتييير، منهم القرود ومنهم غير القرود. كان دايما يحب يلعب ويخرج مع أصحابه فى كل مكان، مش بس فى الجبلاية، لا فى كل الغابة.

Sponsored Links

وفى أى مكان يروحه ليه أصحاب كتييير، والكل كان بيحبه ويقوله «مشمش أبو دم خفيف». كان دايما يحب يهرج ويضحك وما يحبش أبدا أبدا يحس إنه زعلان، ولكل مشكلة عنده ألف حل. وعلى الرغم من إنه له أصحاب كتيير، وعلى طول بيضحك ويهزر والناس شايفاه على طول مبسوط، إلا إنه كان دايما حاسس إنه مش سعيد، وجواه خوف كبيير من إنه يكون نفسه فى حاجة وما يعرفش يعملها. ودا خلاه ياخد قرار وقال: أنا مش هحرم نفسى من أى حاجة تخلينى سعيد ومبسوط، الدنيا جميلة ولازم تتعاش من غير ما أعمل لأى حاجة حساب.

وكان له يوم بيروح يتعلم فيه قوانين الجبلاية مع باقى القرود الصغيرين، وكان من القوانين دى إنه ما ينفعش أبدا يحصل صوت عالى فى الجبلاية بالليل علشان الضباع والأسود ما حدش فيهم يهجم عليهم، وساعتها هتبقى مشكلة كبييرة وهتسبب خطر عليهم.

وفى يوم من الأيام بالليل، نطت فى دماغ مشمش فكرة جنان، إنه يلعب ويتسلق الشجر. جرى على أصحابه القرود، واحد وافقه، والتانى كان قلقان وفَكّره بالقانون. ولأن مشمش ما بيحبش الالتزام، وأول ما فكرة تجيله لازم ينفذها فى الحال، قاله: يا عم، المهم نكون إحنا مبسوطين، خليك انت كدا دايما قلقان، وبتضيع كل المتع والألعاب.

وخرج مشمش مع صاحبه، وعلى أعلى شجرة فى الجبلاية بدأ اللعب والتنطيط، وعلى صوت الضحك والهزار، وفجأة ومن غير أى مقدمات، لقى الأسد قدامه مستنيه. وقف مشمش وصاحبه مش عارفين يعملوا إيه. وقعد يفكر إنه لو جرى، الأسد هيدخل على كل القرود، وساعتها هيكون خطر كبيير. قعد يفكر ويفكر، واتفق مع صاحبه على خطة علشان يهربوا. وفعلا قدر مشمش يهرب من الأسد، بس اتعور فى رجله وإيده كمان، ودا خلاه يقعد فى البيت مدة وما يخرجش، وساعتها مشمش كان طبعا زهقان وملان، أصله مش متعود على كدا، بس مامته كانت على طول تقوله: دا درس ليك علشان تقعد وتركز شوية، مش كل حاجة لعب وهزار، فى وراك مسؤوليات لازم تركز فيها، وتلتزم بالقوانين كمان.

وعدّى يوم واتنين واتعلم مشمش الدرس: إن السعادة اللى بجد مش إنه يجرى يدور عليها فى لعب ولا هزار، السعادة جواه فى كل الأحوال، وإنه يستمتع باللحظات ويتعلم من الأوجاع، وساعتها بس هيقدر يكون مبسوط بجد.

------------------------
الخبر : المصري كيدز.. حدوتة: «القرد المشاكس» .. تخلي جريدة اسرار الاسبوع مسئوليتها الكاملة عن محتوي هذا الخبر وانما تقع المسئولية علي الناشر الاصلي للخبر و المصدر هو موقع : المصرى اليوم

0 تعليق