الارشيف / ثقافة وأدب

قصيدة إيه خطتِك - للشاعر سيد منير عطية

Sponsored Links

رجعالي ليه ؟
إيه اللي فات منك
وراجعه تكمليه ؟
إيه خطتك ؟
قلبي خلاص ما بقاش يدق
الدق مات من طعنتك
فاكره زمان ؟
كنتي الغريقه ف الهموم
والقلب كانلك طوق نجاه
محدوف على الموج العفي
علشان يحاول ينجدك
وطلعتي ع البر الجديد
وفتحتلك جوّه الوريد
أجمل جناين للدفا
عصافير جناين حبنا
ما كانتش يوم متكتفه
كانت طليقه ف السما
وانتي وانا
فارشين هوانا ونبتسم
كان الرغيف لو يتقسم
تلتين عشانك تشبعي
والتلت كنت باخزّنُه
علشان تجوعي ف تلاقيه
وانا قلبي يشبع ..
من مرور الشوق عليه
شوفتي المحبّه قد إيه؟
أو قصدي كانت قد إيه ؟
دلوقتي قلبي صار جريح
ومافيش جريح يتحمّلك
راجعالي ليه ؟
إيه خطتك ؟
لو كنتي ناسيه غلطتك
ف انا لسّه فاكر كل شئ
غدرك
خيانتك
طعنتك
فاكر كمان قلبي البرئ
اللي انكسر من ضربتك
فاكر طريقتك ف الكلام
فاكر كمان ..
زيف دمعتك
فاكر وانا ف عز الدفا
إزاي حدفتيني بجليد
وزرعتي برد ف سكّتي
مع إني بالقلب الكبير
زارع ورودي ف سكّتك
راجعالي ليه ؟
إيه خطتك ؟
دا ان كنتي زاد
ح انوي الصيام
وان كنتي ميّه ح اموت عطش
وان كنتي داء ح استأصلك
أنا كنت عاشقك من زمان
دلوقتي قلبي بيكرهك
ف ان كنتي جيّه بالحياه
ح اتدارى وسط الميتين
واكتب على باب الضريح
ميّت ..
وقلبه بيرفضك
سيد منيرعطيه
من ديوان (فتافيت حروف)

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا