الارشيف / ثقافة وأدب

كل شئ اتهد ...من ديوان "كل الحروف إنتي" للشاعر سيد منير عطية

Sponsored Links

استمع لقصيدة:  كل شئ اتهد ...من ديوان "كل الحروف إنتي" للشاعر سيد منير عطية .. بصوته

وليه احلم ...
مدام الحلم م الأخر
هيبقى كابوس يكتفني
ويرسمني
خيال مربوط على الهامش
ولو شافني ف يوم عايش
هيرميني ف ميت توهه
ودنيا بجد معتوهه
بترفعني كما الريشه
وترميني ف سابع أرض
وليه اضحك ...
مدام الضحكه حزنانه
وغرقانه
ف بحر دموع مالوش مينا
وموجه تجر ف سفينه
تاخدها جزيره مسحوره
ف عصر الناس ما تعرفهوش
مافيش إلا وحوش ف وحوش
مخالب تنهش الابدان
وترميهم ف عز البرد
وليه اصرخ ...
وانا صوتي الضعيف عاجز
يفوت خارج حدود حلقي
وحبل الصوت بقى لشنقي
وأهه تصارع التانيه
عشان تخرج
لكن أبدا ما تخرجشي
ف ترجع ف الوريد تمشي
تزلزلني بصوت الرعد
وليه أبكي ...
وانا الدمع اللي جوّايا
مالوش آخر
لو اسمحله ف يوم ينزل
هيبقى محيط
ولو حتى ما كانش محيط
هيبقى زي نهر النيل
ف يوم ما يفيض
ما يقدر يحجزه ميت سد
مانيش هحلم ولا هضحك
ولا أصرخ ولا أبكي
ولا هشكي ف يوم البُعد
أنا عن كل ده مرتد
م انا يا حبيبتي م الأخر
بنيتك فيّا صرح كبير
وفجأه ..
كل شئ اتهد

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا