الارشيف / بداية نجاح

الحلقة التاسعه عشر ... إنت إنسان سادي؟!

في الحلقة اللي فاتت كنا في مصارحه حره مع بعض وجاوبت علي معظم أسلئتك اللي هنكملها ان شاء الله في الحلقات الجايه ... أنا عماله بتكلم وأنت عينيك منزلتش من علي العنوان  ... علي ملامحك علامات إستغراب وتعجب وعدم فهم ...

هو إيه الموضوع ؟!

Sponsored Links

ويعني ايه السادية ؟!

أقولك أنا بقي ... سمعت عن السادية  ؟!

أه طبعا سمعت عنها

جميل جدا وهو المطلوب لكن خد بالك الناس فاكره ان السادية دى طبع أو أسلوب شخصي والشخص السادي بيحب يعذب اللي قدامه مستغل بقي سيطرته أو أي شئ قوي يمتلكه لكن المعلومه دي مش صحيحه ميه في الميه...

الساديه أصلا مش أسلوب حياة ولا طبع ... خالص ... بالعكس ... دا نتيجة ظروف الانسان بيمر بيها من ضغوطات وصعوبات وفي بعض الحيان شعوره بالحرمان ... بيبتدي يعتنق الاسلوب ده وبعدها الانسان بيمرض بيه و بيجري في دمه من الأخر ويري في القسوه والأذيه سعاده ... بعض علماء النفس بيقولوا ( دون وعي)  وده أمر غير صحيح ... لأن مريض الساديه بيكون علي وعي  كامل بعد فعل الأذيه والتلذذ وقتها بيكون زي أي شهوه موجوده جوانا أول ما بتروح الشهوه وبيقعد مع نفسه بيراجعها وساعات ضميره بيأنبه ... وممكن يعمل الحاجه وعكسها ... زي مثلا ... ولا أقولك مش هديك المثال دلوقتي !

هشرحلك أكتر الاول عن المرض دا علشان تعرف أنا قصدي ايه من حلقة النهارده بالظبط ... المريض بالمرض ده تلاقيه دايما عصبي ... صوته عالي تقريبا مبيسمعش غير صوته ..  بيبان انهم أصحاب قلب رحيم لكن هما في الحقيقه قلبهم قاسي جدا بيتلذذوا بتعذيب الاخرين ولكنه مش تعذيب جسدي فقط زي ما احنا فاكرين ... خالص ... ياكبير ... ممكن يكون التعذيب نفسي أو أجتماعي ... وخدلي بالك أنت !

وغالبا دا اللي بيكون منتشر أكتر من التعذيب الجسدي لكن علشان نظرتنا للساديه انها جسديه فقط فمنصنفش الناس اللي بتعذب الناس نفسيا واجتماعيا بالساديه ... الساديه مرض نفسي حقيقي وصعب لان المريض للاسف بيكون علي وعي كامل باللي بيعمله ورغم كم الصراعات الداخليه اللي جواه ... مستمر في طريقه لكنه دايما طريقته غريبه جدا ... مثلا ... شاف حد بينجح لكن الشخص دا عنده نقطة ضعف ما ... الشخص السادي عارفها... يقوم يعمل ايه بقى ... في لحظة سعادة الشخص الاخر ... في نفس ذات اللحظه يعمل كل اللي في وسعه علشان يقهره ... علشان يشوف حزنه ... علشان يذله... وبعد لما يشوف دا ... والشخص السادي يتلذذ ... ممكن علشان يريح ضميره يحل للشخص الي تسبب له في الاذيه جزء صغير جدا من المشكله ... وليست كلها ... علشان يعرف يعزبه المره الجايه... الشخص السادي غالبا مش بيكون ذكي بالدرجه الكافيه ... أنا مقولتش غبي .. . ولكن ليه أخطائه اللي بتكشفه ... هديك أمثله :

  كانت جتلي مشكله من فتره ... أن في مدير كان بيتلذذ  بالشجار مع موظفيه لدرجه الإهانه وانه بيتلذذ إنه بعدها يحكي لباقي الموظفين انتم عارفين انا خليت الموظفه الفلانيه تبكي ... أو أهنت الموظف الفلاني وبيكون في قمة سعادته لفتره النشوه بعدها بيراضي الموظفين اللي أذاهم نفسيا ولكن بعد ايه كان كل موظف يحمل له كرها كبيرا لانه جرحهم في كرامتهم .. لما اتي احد الموظفين يبحث في حياة هذا المدير وجد عنده عقد منذ الصغر تسببت له في السادية ورغبته في الانتقام من الاضعف منه

   وفي مشكله تانيه لفتاه وصديقتها فكانت عندما تضع الفتاه صورة لها علي موقع التواصل الاجتماعي وتري صديقتها التفاف الناس حولها ... وبما انها تعرف كل شئ عنها فكانت تعرف تماما كيف تبكيها وكانه من الإجرام أن تسعد هذه الفتاه

  في بقي أشكال تانيه كتير أعصبك ... أعيطك ... أذلك ... العب في عقلك البخت ... لو نجحت أوقعك ... لو فرحت أحزنك ... لو سليم أمرضك ...من الاخر أذلك علشان استمتع ولما أفوق وضميري يأنبني ارضيك بحته صغيره كدا تخليك لما تفهم تستغرب وتقول إيه الشخص دا بيزعلني ويراضيني ... بيبهدلني ويقف جنبي

مريض الساديه بيهرش لو مقدرش ينجح في تعذيب الضحيه والامها ... أصحاب المرض دا دايما بتلاقيهم مش واثقين في انفسهم حتي لو (قالوا عكس دا ) لان عدم الثقه بتكون باينه في تصرفاتهم ...علي طول قلقانين ... حاسين دايما انهم اقل من غيرهم علشان كدا بيلجأوا لانهم يعذبوا الاشخاص اللي هما حاسين انهم احسن منهم او عندهم ميزه موجوده فيهم مش في صاحب المرض السادي عايش فرحان مينفعش طبعا لازم يضربوا كرسي في الكلوب ...صاحب المرض السادي حاسس من (جواه) انه شخصيه فاضيه ملهوش لازمه رغم انه بيقول غير كدا ...

أثبتت التجارب أن مريض الساديه تعرض في مقتبل حياته بأزمة انسانيه قوية ... أو الاخرين مكنوش متقبلينه في دائره حياتهم بشكل أثر علي نفسيته... علشان كدا بياخد بطاره بس من ناس ملهاش ذنب

أنا مش بتهمك بالساديه .... أنا عايزاك تقعد مع نفسك تشوف انت بتعمل كدا؟

بتعذب ولادك أو زوجتك بالضرب او بالاهانه او بالذل سواء نفسيا او اجتماعيا أو ماديا؟

بتلذذ لما توقع اصحابك في مصايب علشان تشوف فشلهم وذلهم؟

بتحب تعصب اللي قدامك؟!

بتحب اللي حواليك الحزن ماليهم وأقل منك؟!

بتزعل لما بتشوف حد فرحان ولا اراديا بتحاول تزعله وتعصبه ... وبعد كدا ضميرك بيأنبك؟!

وغيرها وغيرها من وسائل الالم ... من فضلك زي ما وعدتني تكون صريح مع نفسك خليك قد وعدك وصارح نفسك مش شرط تصارحني أنا لان في الاول وفي الاخر أنا مجرد أداه لمساعدتك ليس الا ...مستنياك الحلقه الجايه

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى