الارشيف / بداية نجاح

الحلقة العشرين ... إنت أستاذ ورئيس قسم

مينفعش نبتدى الحلقة دي من غير ما أشكركم علي الرسايل الجميلة اللي بعتوها ... وسعيده إن الحلقة التاسعه عشر ( إنت إنسان سادي؟!) نالت أعجابكم بالشكل دا ... شكرا ليكم

في الحلقة اللي فاتت ... إتكلمنا عن السادية وإن السادية دي مش أذيه وعنف جسدي بس ... لا ... دي بتصل لنفسي واجتماعي كمان ...

Sponsored Links

عنوان حلقه النهارده ... إنت أستاذ ورئيس قسم ... لكن يا تري في إيه؟!

  لكن قبل ما ندخل في الموضوع ... عايزه أقولك إننا زي ما عندنا الخير جوانا ... عندنا الشر برضه ... لكن الإنسان نفسه هو اللي بيحدد أي طرف هيزيد عن التاني... وفي حلقات غير حياتك إحنا بنركز أن حياتك تتغير للأحسن مش للأسوأ وعلشان كده بنركز علي تحويل سلبياتك الى إيجابيات علشان تقدر تعيش حياة سوية ... تبقى راضي عن نفسك ... عارف تكمل مشوارك ...

كل واحد مننا أستاذ ورئيس قسم في حاجه...زي مثلا

أستاذ ورئيس قسم في:

* الطيبه

* الذكاء

*التخطيط

* السياسه

* النكد

* الشر

* إشعال الفتن

* الأنانيه

* الغيره

*حب التملك

ومن وجهة نظري أن أخطرهم علي الاطلاق أنك تكون أستاذ ورئيس قسم في حب التملك ... لإن لو كنت مصاب (بمرض حب التملك) فأنت مصاب بباقي الأمراض السابقه زي النكد ... الشر ... إشعال الفتن  ... الانانيه ... الغيره...

متستغربش ... هقولك إزاي ...

الإنسان المصاب بمرض حب التملك ... بيكون عامل زي المجنون نفسه يحط الناس أو الحاجات اللي عايزها في قمقم ويقفل عليهم ودايماً بتكون طريقته  شعارها السيطره والإستغلال ... بيحب يسيطر علي الناس و كل حاجة هو عايزها علشان يشعر بالأمان ... تخيل ؟!

وممكن تكون السيطره صريحه زي أنه يمارس التسلط والقهر المعلن (وده نوع من أنواع الشر) وممكن يكون بطريقه غير مباشره من خلال :

 - " النكد و إشعال الفتن " علشان الشخص ميكنش قدامه غيره فيلجأ ليه!  وبيوصل هنا للأنانيه"

   وبعدها يثبت بكل الطرق أنت بتاعي أنا بس ولو مكنتش ليا يبقي هدمرلك حياتك" الغيره " )

 

يااااه ... كل ده ممكن يعمله مريض حب التملك ... وأكتر كمان ...بيتحول لإنسان مجنون ... مؤذي .... اللي قدامه بيكون فاهمه لكن مش قادر يتخلص من شره و خصوصاً لو هو من المقربيين لحياته

أنا مش هقول كلام إنشاء يدخل من الودن دي ويخرج من التانيه ... لكن الواقع بيقول أن حب التملك مرض وصاحبه (مريض) ولا يمكن السيطره عليه بسهولة ... ويجب توخي الحظر عند التعامل مع أشخاص من النوع ده ... لإن للأسف ضررهم أكتر من نفعهم ... وبيستغلوا كل حاجه يعرفوها عنك ضدك ...

و دول الحل معاهم إن لو قدرت تبعد عنهم يبقى خير وبركه ... لكن لو مقدرتش ... إعتبر أسرارك وحياتك ملكك إنت بس ... أوعي تفضفض معاهم ... مهما بلغت خنقتك.... أوعي تبين ضعفك ليهم مهما حصل ... علشان يحسوا إنك غامض ... زئبق ...

مش الحكمه بتقول تكلم حتي أراك .... الغموض بيكون هو الحل لتجنب جزء كبير من أذاه... طيب دا في حالة إنك لو إنت في حياتك الأشخاص دي ...

لكن يا تري ... أنت نفسك مصاب بالمرض ده ؟!

عايزاك تراجع تصرفاتك :

* هل لما بتكون عايز حاجه لكن الحاجه دي في أيد غيرك ممكن تعمل أي حاجه علشان تاخدها؟!

* هل لو بتحب شخص ... بتبقى حاسس إنك أمتكلته ولو حاول يبعد بتأذيه بكل الطرق سواء أذيه ماديه ... أو... نفسيه ... أو إجتماعيه ؟!

* بتخاف تبقى لوحدك؟!

* حاسس إن الناس بتبعد عنك؟!

* في أول أي علاقه بالأشخاص سواء حب أو أصداقاء أو جيران أو أي حد بيتقال عليك طيب وسرعان لما بيتقلب رأيهم من النقيض للنقيض وبتكون النتيجه في الأخر هي أجتنابك؟!

* عصبي زيادة عن اللزوم لما بتغير... وبتحس أن غيرتك غير مبررة ؟!

* بتحب تكون السبب الوحيد لفرحة اللي حواليك ... ولو أتوجد سبب سعاده أخر بتنزعج جداً وبتحاول تشوه صورة المصدر ده أمام الاخر؟!

* هل لما بيكون عندك صديق بتزعل لما بيصاحب حد غيرك و بتكون عايزه ليك لوحدك ؟!

* بتصيبك حاله من تعكر المزاج لو شفت حد في دايرة حياتك سعيد بسبب خبر أوحدث إنت ملكش يد فيه؟!

*بتحب توقع الدنيا كلها في بعضها وتظهر إنت كحمامة سلام رغم إنك سبب البلاوي كلها علشان الناس كلها تيجى حواليك؟!

فكر في الأسئلة دي كويس وإنت قاعد مع نفسك قاعده الصراحة إياها اللي احنا اتعودنا عليها من أول حلقه! لأن طول ما إنت صريح مع نفسك ... هتلاقي حل لإستقرار حياتك وتغيرها للأحسن

بس قبل لما أنهي عايزه أقولك إن مريض حب التملك بيمرض بهذا المرض نتيجة شعوره بعدم الأمان المزمن سواء بسبب حدث أو سوء معاملة الاهل والمجتمع الخارجي ...

أشوفكم الحلقه الجاية ....

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى