الارشيف / بداية نجاح

غير حياتك مع رضوى إبراهيم .. الحلقة الواحد والعشرون... ألا فين هدوئك يا معلم بيومي ... (الجزء الأول)

إزيكم بجد وحشتوني من الإسبوع اللي فات ... لكن اللي بيفرحني كم الرسايل اللي بتوصلني منكم بعد كل حلقة ...

في الحلقة اللي فاتت ... كان موضوع حلقتنا على  "إنت أستاذ ورئيس قسم" ... لكن ياترى في إيه .... وإتكلمنا بالتحديد عن حب التملك وقولنا إن ده مرض نفسي خطير شامل النكد والشر وإشعال الفتن والأنانيه والغيرة ... وسألتك شوية أسئلة وإتفقنا إنك تكون صريح مع نفسك وإنت بتجاوب عليهم

Sponsored Links

في الحلقة دي ... هنتكلم عن البرود و القلق ... متستغربش أصلهم الإتنين بيأثروا في حياة أي إنسان بالسالب

هنتكلم الأول عن البرود ... في فرق بين الهدوء والبرود ... عارف الفرق بينهم؟ هقولك أنا ... الهدوء إنك من أصغر لأكبر مشكلة ... بتفكر بهدوء  وبعقل ، مش متهور من الأخر (راسي كدا ومتقني) .... أما البرود بقى ... إن مهما حصل للشخص مبيتأثرش ولا بيبكي ولا ينفعل ولا (يحل) أي مشكلة ... الناس بتكون شايفينه مكبر دماغه من الدنيا ... أو عقله ملمس ... ولا ركبه عفريت ... ويمكن يكون معموله عمل ... المهم كلام الناس كتير ... ما إنت عارف الناس عاملة إزاي! وتفكيرها إزاي! والناس  اللي بتشوف الإنسان البارد  بتشوفه مش طبيعي وإن تصرفاته عكس قانون الطبيعة آل يعني إصدار أحكامهم وتشخيصهم هو اللي مع قانون الطبيعة وكأن قانون الطبيعة أخوهم التوأم ... ما علينا ... لما تشوف شخص بارد في إنفعالاته زيادة عن اللزوم ... هو كدا

 فعلا لكن (ظاهريا) بس ... سيبك من كلام الإنشاء ... وخلينا في الواقع راقب تصرفات الإنسان اللي بيتصف سلوكهم بالبرود وركز في حياتهم ... هتلاقي الناس دي إتعذبت عذاب نفسي كتير في حياتهم ... إتعرضت لصدمات كبيرة ... أو صدمات غير متوقعة من ناس غير متوقعه أنها تصدر منهم أي صدمه... وفضلت تضغط على نفسها ... إعتقادا منها إنها قوية ... أو عدم الاعتراف بالضعف والتأثر بأي صدمه... لكن هما في الحقيقة بيتلفوا أعصابهم من غير ما يحسوا ... بيدوا فرصة للحياة أنها تموتهم وهما عايشين ... وبيدوا فرصة لناس ملهاش لازمة تقول عليهم أنهم باردين ومش طبيعين ... لا و إيه كمان بتصدر أحكام عليهم  وكأنه مغفورلهم...

المهم ... نسبه الناس المصابون بالبرود الإنفعالي قليلين جدا بالنسبه للناس العصبية والقلوقه ... لكن ... للأسف ... معاناتهم الداخلية كبيرة جدا تفوق قدراتهم علي التحمل وتقبل الواقع المرير بالنسبة ليهم...

إنت بقى ... مصاب بالبرود الإنفعالي؟!

كل حاجه ليها علاج ... وأي حاجة في حياتك بتأثر في تغير حياتك بالسالب أو بالموجب... وأنا دوري في حياتك إني أكون عامل مساعد لتغير حياتك لكن بالموجب و للأحسن

لو إنت مصاب بالبرود الإنفعالي ... في إيدك الحل ...لازم تحل مشاكلك القديمة وكافة الصدمات اللي إتعرضت ليها  داخليا (داخل نفسك) بالبلدي اكنس أي تعب وخنقه جواك ... هو صعب بس هتقدر ...هتاخد وقت ...بس هترتاح... وأعرف إن الحياة أتفه من إننا نزعل علي أي حاجة بتحصل فيها ... لأنه ببساطة ... الحياة متغيرة ومواقفها مش دايمة ... ومشكلة النهاردة لازم تتحل بكرة ...

هستنى نتيجه قعدتك مع نفسك

كنت ناوية أتكلم عن البرود والقلق لكن الوقت أخدنا في موضوع البرود الإنفعالي ... ملحوقة الحلقة الجاية هنتكلم على القلق ... مستنياكم الحلقة الجاية ....

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى