الارشيف / بداية نجاح

غير حياتك مع رضوى إبراهيم - الحلقة الثانية والعشرون ... إهدا وقول هديت (الجزء الثاني)

إتكلمنا الحلقة اللي فاتت عن البرود وليس الهدوء... وقولنا رفقا بالإنسان اللي ظاهريا بيكون بارد لكن من جواه وجع ... وسألتك إيه ؟ شايف نفسك من النوع دا ولا لأ ؟

في حلقة النهاردة هنتكلم عن نقيد البرود ... وهو الإنسان القلوق ... القلق في أغلب الأوقات دا لو مكنش كل الأوقات بيقلب بعصبية ...

Sponsored Links

لكن الأول عايزين نعرف مع بعض يعني إيه "قلق" ... بشكل بسيط تفهمه من غير تعقيد ولا كلام بتوع النفسية المعقد ده ... عارفة إنك بتقول كدا فقولت أريحك وأقولك الكلام اللي جواك على طول

القلقان دايما حاسس بعدم إرتياح نفسي وخوف وتردد ودا بيخلي دايما الناس تحكم عليه إنه شخصية كئيبة أو مزاجي (ساعة تروح وساعة تيجي) .... لكن خلي بالك القلق غير الخوف علشان بس متقعش في الغلط اللي بيقع فيه معظم الناس

الإنسان لما بيشعر بالخوف من شئ معين بيتجنبه وخلاص خلصنا ... لكن القلق مدمر مش من السهل السيطرة عليه ولا تجنبه لإنه بيكون في الغالب على كل حاجة وأي حاجة ... دا ساعات الإنسان المصاب بالقلق لو ملقاش حاجة تقلقله بيقلق على نفسه و من نفسه  ... بيقلق من الهوا ... بيقلق من الوهم ...أه والله زي مابقولك كدا ...

لكن القلق بيكون مرض لما بيحصل في فترات متقاربة دون حدوث سبب فعلي ...

معاك ممكن يكون القلق إتحول لمرض عندك ... بسبب صدمات متتالية ... كانت صعبة علي عقلك إستيعابها ... وإترجمت لخوف دايما من الحياة ومفاجأتها....

وممكن يكون مش إنت اللي مصاب بالقلق ممكن يكون حد في دايرة حياتك ... أخوك ... أختك ... مراتك ... أي حد ... لكن في الأغلبية العظمى بنطلق علي الشخص المصاب بالقلق أنه شخص مزاجي ... الأربع فصول عنده بيحصلوا في يوم واحد

... علي طول الشخص متوتر في كل مجالات حياته ... بيته ... شغله ... مستقبله ... بينه وبين نفسه ... كل وقت وأي وقت...

الناس اللي حواليه بتشوفه مزاجي وكئيب ... وهو بيشوف نفسه إنه طموح وبيستعد لأي مفاجأة في حياته ( بيسبق بالقلق يعني ههههه)

مريض القلق ... أو ... الشخص المزاجي ... الضريبة اللي بيدفعها كالأتي:

* صداع دائم ... وغالبا بيكون صداع نصفي

* العصبية والتوتر الغير مبرر والمرعبة في بعض الأحيان

* صعوبة التركيز ... مش بيقولك إهدا علشان تركز ... طيب إنت لو طول الوقت زي الفولة اللي علي النار هتركز وتنجح إزاي؟!

* التعب ... الشخص القلوق أو المزاجي على طول حاسس إنه تعبان ... همدان ... كل حاجة في جسمه تعباه ... شايف إن صحته في النازل (أعراض خداعه نفسية)

* قلة الصبر... الإنسان القلقان الصبر ميعرفش ليه عنوان ...على طول زي الفولة اللي على النار ... عايز الحاجة وقتي ... ولحد ما تتحقق ... بيكون خلاص جاب أخره هيجراله حاجة

* الأرق ... وما أدراك ما الأرق ... تقريبا الباشا مش بينام ودا طبعا بيأثر علي جهازه العصبي تأثير سئ جدااااااااااااااا

بص بقى يا كبير لو إنت مصاب بالقلق أو أي حد تعرفه ... لازم تواجه نفسك وأوعى تشتغل نفسك

* فكر بعقلانية إيه اللي هتستفاده من وجع الدماغ وتلف الأعصاب الغير مبرر واللي أنا حاطط نفسي فيه

* أخرتها إيه ؟! ... إسال نفسك أخرتها إيه ...إيه أسوأ سيناريو ممكن يحصل لأي موقف إنت بتتعرض ليه ... هتحس إن الموضوع أبسط من اللي إنت بتعمله... تصدق هتصعب عليك نفسك من اللي إنت بتعمله فيها

* بلاش تشتغل نفسك و واجه أحسن علشان إنت لو إتعودت أكتر من كدا هيبقى لازق فيك زي الأتب ومش هتعرف تتخلص منه غير بخلع الضرس

من الأخر أوفى  بوعدك معايا ... وخليك صريح مع نفسك جدا ... وإعرف إن رحمتك لنفسك واجب وفرض عليك إنك تحميها منك ... لإن محدش هيعرف يحميها غيرك ...

جه الوقت إنك تقف مع نفسك وقفة بجد ...

جه الوقت إنك تقول للقلق ... كفاية ... دمرت حياتي....

جه الوقت إنك تستمتع بحياتك قبل ما تروح منك يوم ورا التاني أصل اليوم اللي بيروح ما بيرجعش تاني ...

جه اليوم إنك تفرح لإن حرام اللي إنت بتعمله في نفسك....

جه اليوم إنك تقول كفاية أنا بموت وأنا لسه فيا نفس....

جه اليوم إنك تتعشم في ربنا يا أخي وترمي حمولك عليه....

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى