الارشيف / بداية نجاح

غير حياتك مع رضوى إبراهيم ... الحلقة الحادية و الثلاثون - إضحك يابن النكدية

 

الحلقة اللي فاتت خلصنا كلامنا عن الثبات الإنفعالي والتحكم في الغضب 
في حلقة النهاردة هنتكلم عن نوعية البشر اللي مش بتعرف تستمتع بحياتها ...
بتخاف تفرح ... بتكسل تضحك ...ماعلينا , المهم مش بيعرفوا يستمتعوا بحياتهم ... لما بيحصلهم موقف مفرح تلاقيهم بيخترعوا أي مشكله علشان يمدوا بوز البطه...
لو إنت من النوع دا ياريت تركز معايا الحلقة دي علشان تتخلص من العادة الغلط دي ...  
بصراحه كدا ... كام مرة سمعت جملة إضحك يابن النكديه ... أبوس أيد الحاجة إفرح؟
هههههه مش هحرجك جاوب بينك وبين نفسك ...
في علم النفس بيقولوا أن دا مرض ولازم يتعالج ... في برنامجنا غير حياتك إحنا بنحاول نحل المشكلة لان كلمه مرض صعبة جدا و نلحق المشكلة  قبل ما تحصل.

Sponsored Links

لو هنمشي علي الكلام الدارج إن دا مرض نفسي ... يبقى كمان ربنا إدانا عقل ومافيش شخص بيمرض بمرض نفسي لوحده لازم يكون في طرف تاني أو حدث هما سبب المرض لكن بلاش نقول كلمة مرض دي لانها كلمة كبيرة ... تعالى نسميها مشكلة ... و كل مشكلة و ليها حل ... مشكلة أن مش بتعرف تفرح بحاجة أو تحس بالمتعه بأي حاجة

عايزه أسئلك:

* حاسس إنك على طول مخنوق؟!
*حاسس بشعور غريب بين الكآبة وعدم الاستقرار؟!
*بتسأل نفسك ما كل الناس بيجيلها إكتئاب ويروح وبتمشي حياتها عادي وبتفرح الا أن مهما حصلي حاجة مبعرفش أفرح ولا أستمتع بفرحتي؟!
*بتحس بتعاسة غير مبررة؟!
*مبقتش في حاجه بتهتم بيها وشايف المجتمع عبثي ما يستحقش الاهتمام أصلا لكن ممكن يستحق الشفقه؟!
*مبقتش واثق في نفسك؟!
*يأس وشايف أنه مافيش فايده وأن ست أمل ماتت؟!
*حاطط نفسك تحت ضغط أكتر من اللازم مع أن مافيش حاجه حصلت تستحق كم الضغط دا؟!
*بتفكر في الانتحار؟!
*مش عارف تركز كويس؟!
*خايف تأخد قرار؟!
*مش عارف تنام أو نايم طول الوقت ؟!
*جسمك تعبان جدا؟!
*بتعيط كتير أو على طول عايز تعيط؟!
*معندكش طاقه أنك تعمل الطبيعي ؟!
*معندكش قدره أنك تتفاعل مع الناس أو تكون أجتماعي؟!

لو عندك الكلام اللي فوق أو حتي معظمه ... دي الاسباب المستجده لاحساسك بعدم الاستمتاع ... لكن الـأسباب الفعليه (الحقيقيه)... لازم أنت تقعد مع نفسك وترجع لورا وتشوف أيه اللي حصل في حياتك ... من أشخاص أو أحداث كسرت الفرحة جواك أو زرعت جواك الخوف من الفرحة وزرعت اليأس ... هو أنا يعني لما أفرح هفضل فرحان؟! أكيد حاجه جوايا هتعكنن عليا !
بعد بقي لما توصل للأسباب الحقيقية اللي كسرتك عايزه أقولك كلمتين ...

الدنيا فعلا مبتتغيرش وهتفضل زي ماهي ... إنت اللي بتجمد بمرور الوقت علشان تقدر تواجهها وتتفاعل معاها و تقدر تتحدها... وتفرح لأنها فانية...  كده كده ميتين ميتين ... فمتجيش أنت تطلع ميتين أم النكد علي نفسك كمان ... الحياه مش ناقصة أنك تنكد على نفسك... أعمل الصح وأفتكر أنك بطل حياتك فأوعى ترضى تعيش كومبارس ... وأضحك لكن من غير ما حد يقولك أضحك يابن النكديه

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى