أخبار عاجلة

غير حياتك مع رضوى ابراهيم ... الحلقة الثانية و الثلاثون "الأخيرة من الموسم الأول" .... مصارحة حرة

غير حياتك مع رضوى ابراهيم ... الحلقة الثانية و الثلاثون "الأخيرة من الموسم الأول" .... مصارحة حرة
غير حياتك مع رضوى ابراهيم ... الحلقة الثانية و الثلاثون   "الأخيرة من الموسم الأول" .... مصارحة حرة
Sponsored Links

عدى الموسم الأول من غير حياتك بسرعة البرق ... والنهاردة أخر حلقة مصارحة حرة علشان أجاوب علي أسئلتكم  ... يالا بينا:

 

*أحب أشكرك علي حلقات غير حياتك ولكن لي سؤال كيف أتعامل مع زوجتي العصبيه؟
كيفية التعامل مع شريك الحياة هيكون إن شاء الله في الموسم التاني من غير حياتك مع رضوى ابراهيم ... إزاي تختار شريك حياتك

Sponsored Links

*كلام حضرتك جميل والواحد بيحس إنه متفائل و ده بيروح في ثانية مع أول خبر أو بوست علي الفيس بوك

أولا متشكرة جدا على كلامك ... ثانيا مش أي خبر علي الفيسبوك بيكون صحيح وأي بوست بيكون رأي شخصي لصاحب البوست ومش معنى كدا إنه صح مية في المية ... حط في إعتبارك أن اللي عايزه ربنا هو اللي هيكون فنسعى ونعمل اللي علينا واللي عايزه ربنا هو اللي هيحصل

*حضرتك كتبتي بوست علي صفحتك أن الايام دي بتفكرك بنكسة 67 لكن التاريخ بيقول أن كل نكسة بعدها نصر ... أنا مفهمتش البوست لكن حسيت أن حضرتك متفائلة ... ممكن توضحي معني البوست؟

فعلا الايام دي بتفكرني بنكسة 67 لكن للأسف الفرق إن في 67 كان عدونا معروف لكن حاليا عدونا منا فينا ودا أخطر ... النكسة بقت فكريه ... والتشائم بقت اللغة اللي بيتكلم بيهاالشعب ، الشعب اللي هو هو لما الرئيس جمال عبد الناصر قال إنه هيتنحي بعد نكسة 67 قالوا " *** *** لا تتنحى" والشعب قام بثوره علشان الرئيس جمال عبد الناصر يرجع عن قراره ولما مسك الرئيس السادات كأنه ضده بكل الطرق لحد ما جاب النصر إنقسمنا لنصفين في اللي قال عليه دكر وفي اللي قال عليه خاين علشان المعاهدة اللي عملها وإحنا نفس الشعب اللي قال للرئيس حسني مبارك أختارناه وبايعناه وقعدنا مطريين علي روحنا وحاطين أعصابنا في الزبادي وأحنا نفس الشعب اللي لما شويه ناس قال هوبا ثورة نزلنا وخلعنا وبعدها لما جه الحكم إياه فرحنا وبعدين زعلنا وقولنا ولا يوم من أيامك يا أبو علاء ودلوقتي لما مسك الرئيس عبد الفتاح وهو أخد البلد معدمة إتقسمنا مقيدين ومعارضين ولا دا فاهم ولا دا فاهم إحنا نفس الشعب دلوقتي اللي إتكسر من جواه من كتر ماهو مش فاهم وبيمشي ورا الأغلبية لحد ما أخد على قفاه وإتكسر وفقد الثقة في كل اللي حواليه دا حتى فقد الثقة إنه في أمل أساسا ... النكسة جوانا... دا البلد بقت ماشية أحزاب وكل حزب بيطبل علي مصلحته وفي النص شعب غلبان مش فاهم لكن عايز يستقر... بزمتك مش نكسة لكن إن شاء الله بعدها نصر لو اتفقنا علي حب البلد دي اللي معملتش فينا حاجه وحشة وذنبها الوحيد إننا عايشين علي أرضها

*كل مواضيع غير حياتك كانت جميلة وفي نفس الوقت صادمة إزاي جت لحضرتك فكرة غير حياتك؟

فكرة غير حياتك مع رضوى إبراهيم كانت موجودة من سنين لكن ظهرت للنور من سنة ونص وجتلي الفكره من كم التناقضات اللي جوانا وأن كل واحد فينا عنده أوضته الضالمة اللي محدش بيدخلها غيره لحد ما تعبته من كتر كركبتهاوإبتدت تضغط علينا بشكل خلانا مرضى نفسيين فكان لازم وقفة

*ماخوفتيش من كتابة مقالات غير حياتك باللغة العامية وإختيار مواضيع وكتابتها بطريقة أول مرة حد يكتبها بشكل حلقات مكتوبة لكن بيحسس قرائك إنها مرئية؟

ههههه لا ما خوفتش علشان كان لازم وقفة وتناول موضوعات مهمة بأسلوب سهل لإن الناس تعبت بجدوكان لازم حل مش كل الناس بتقدر تاخد كورسات 
life coaching 
فكانت فكرة مقالات غير حياتك علشان توصل لشريحة كبيرة وكانت تستهدف الشباب علشان هما أكتر فئة دلوقتي مخنوقه ومش عارفة تبدأ منين وغير حياتك كان هدفها إنها ترتب النفس البشرية من جوة علشان هما يقدروا يرتبوا حياتهم اللي بره

*عجبتني جدا عباره أنت بطل حياتك فأوعى ترضى تعيش كومبارس ...

شكرا جدا والحمدلله إنها عجبتك ... والجمله هي الأساس اللي هيفهمها صح هيعيش حياته صح

*إمتى بقى الحلقات دي هتتعمل في التلفزيون ؟

ههههه قولي يارب

*إنتي إزاي حاسه بينا كدا؟

ههههه علشان أنا إنسانه زيكم وبعاني بمعظم معاناتكم بجانب دراستي 

*أحلى حاجة فيكي إنك في كل حلقة بتقولي بعيدا عن كلام الإنشاء؟

هههه علشان أنا أكتر واحده  عانيت من كلام الإنشاء اللي بيدخل من الودن دي وبيخرج من التانية بدون إستفادة فعلية  فكان لازم أقول اللي قناعتي راضية عنه وهو كلام قليل لكن يجيب جون

*حياتك إختياراتك ... وأنا مجرد عامل مساعد أكتر كلمتين بترديدهم في كل حلقة؟
فعلا لان دي الحقيقة اللي بحب أفكر القارئ بيها دايما أنه هو الاساس وأنا مجرد عامل مساعد إرشادي ليه بس

*أنا مخنوق أوي لكن لما قريت المقالات حسيت إني عامل زي الغريق اللي بيتعلق في قشايه

وافرض أنه ماكنش في مقالات غير حياتك كنت هتفضل غريق لحد ما تموت؟ الكلام دا مينفعش لازم تكون قد الحياة علشان الحياة بتفرم المتشائم الضعيف 

*حضرتك ما بتتكلميش عن الدين خالص ولا بتستندي بيه ولو استندي بيبقى بالدين الإسلامي والمسيحي هو حضرتك ديانتك إيه؟

الدين معاملة وكل الأديان السماوية حثت علي السعي والإيمان وعدم فعل الكبائر المعروفة ومين قال إني ما أستندتش على دين ماهو لما أقولك إتفائل دا من الدين لما أقول لك أسعى دا من الدين لما أقولك لك خلي عندك سلام نفسي دا من الدين 

***********************************

ودا كان جزء من أسئلتكم .... هنعيد حلقات غير حياتك الموسم الأول (غير حياتك مع رضوى ابراهيم  - حياتك إختيارتك) وبعدها هنبدأ بأمر الله الموسم التاني (غير حياتك مع رضوى ابراهيم - إزاي تختار شريك حياتك)

قبل ما أقفل حلقتنا عايزه أقولكم كلمتين 

*أنا مجرد عامل مساعد لكن إنت الأساس

*إنت بطل حياتك أوعى ترضى تعيش كومبارس

*الانسان خلق أسير لظروف إما أن يفك أسره أو يظل عبدا لظروفه مدى الحياه

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

معلومات الكاتب