الارشيف / بداية نجاح

إعادة حلقات - غير حياتك مع رضوى ابراهيم .. الموسم الأول ... الحلقة الرابعة: ضيعت وقت قد إيه من عمرك؟!

إعادة حلقات -  غير حياتك مع رضوى ابراهيم .. الموسم الأول ...

الحلقة الرابعة: ضيعت وقت قد إيه من عمرك؟!

Sponsored Links

-----------------------------------------

طيب هل عمرك بيتحسب إنه ضاع بالوقت اللي بيمر منه ؟ ولا بكم الفرص اللي بتضيعها طول ما أنت ماشي في رحلتك؟!طيب إنت اللي بتقوله وبتنتقده في كل حاجه حواليك ... بتطبقه علي نفسك  ... ولا بلح

يعني مثلا بتنتقد فلان إنه مش ملتزم في مواعيده أو بيكذب كتير أو ملهوش كلمه أو عيل هفق أو مؤذي أو غيار أو... أو... أو... من أي طباع سيئه ... طيب إنت بتعمل عكس الحاجات الوحشه دي ؟!

يعني ملتزم في مواعيدك ؟! بتيجي  في ميعادك بالظبط؟! طيب لو الميعاد مش علي هواك وإنت أصلا مش عايز تروح ... بتعتذر ؟! عندك القدره علي فن الإعتذار ؟! ولا مبترحش وبتطنش وخلاص ؟! ومش مهم بقى الناس بتقول عنك إيه ؟! بتكذب كتير علشان تخرج من مواقف ولا الكذب عندك هوايه وبتكذب وخلاص وإنت نفسك مش عارف إنت ليه بتعمل كده ؟! رغم إنك بتنتقد غيرك لو عمل كده؟! وإنت بتكذب بتكون حاسس إنك  مكشوف ورغم كده بتستمر ؟! طيب الكذب عندك خروج من موقف؟! ولا إستمتاع؟! طيب إنت لما بتوعد.. بتوفي .. ولا بلح ملكش كلمه زي الناس اللي بتنتقدها! الناس بستعبطك وإنت عارف إن الناس بستعبطك وعامل قدام الباقي إنك مبيضحكش عليك؟! طيب ياتري إنت مؤذي ؟! طيب الأذيه عندك طبع  ولا لو حد زعلك بيكون رد فعلك الأذية؟! مش فاهم ...حاضر ... هفهمك ... إنت من النوع اللي طول ما أنت ماشي بتأذي مخاليق ربنا ... تدي زميلك بمبه عند مديرك ؟! تبوظ لزميل ليك الشغل ؟! توقع بين فلان وعلان ؟! تعمل حساب وهمي علي الفيس بوك وتدخل تهدد أي حد مش عجبك ؟! النوع التاني من الأذيه ... لما حد بيزعلك ببيكون موقفك إيه ؟! بتاخد موقف ؟! بتمشي ؟! بتزعق؟! بتوسط حد كبير ؟! ولا بيكون رد فعلك معروف إنك بتأذيه؟!

طيب إنت بقى من الناس اللي بتنتقد كل اللي حواليها وفي الاخر بتعمل نفس الفعل ؟!

بتقول يصح وميصحش قدام الناس وإنت في الخفى بتعمل كل حاجه تصح ومتصحش؟!

بتقول حرام وربنا وحساب و ثواب وعقاب وأنا حافظ لكتاب الله وأنت من جواك بتغضب ربنا و مكسوف و حاسس إنك مش صح ... ضميرك بيأنبك ... طيب ساعتها بترجع عن تصرفك ... ولا شويه وبتكمل زي ما انت؟!

عارفه إني بقالي أربع حلقات بطول وبضغط عليك ... بس استحملني وخليك معايا للأخر... وشوية بشوية هتلاقيك بتنضف جواك وبترتب الكركبه اللى جواك ... والحزن الغير مبرر اللي بتحس بيه ... وأحساسك بالاحباط وانك مش عارف تبدأ منين ... من إحساسك بالبكاء من غير سبب؟! هتستغرب وتقولي وده إيه علاقته ... هقولك ده هو الأساس .. طباعك أخلاقك مع نفسك والناس ... تناقضاتك أساس أي لخبطه جواك ... أساس أي تكتيف حاسس بيه ... أنا بساعدك بس ... لكن إنت بطل حياتك ... بإيدك إنت هتكون أفضل الناس أو أسوأهم .....

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى