الارشيف / بداية نجاح

إعادة حلقات غير حياتك مع رضوى إبراهيم - الموسم الأول - الحلقة السابعة : بتقدر تعترف بعيوبك عادى؟

Sponsored Links

بتقدر تعترف بعيوبك عادي؟!

إيه السؤال صعب ده ؟!

Sponsored Links

عارفه إنك هترد عليا وتقولي إنتي بقالك سبع حلقات عماله تسأليني وبس فين الحل؟

إزاي بس ما أنا علشان أديك الحل لازم أوجهك بكل حاجه بيتجي في دماغك أو مش بتيجي في دماغك ... أحطك قدام نفسك ! وبعدها إنت نفسك هتلاقي الحل ... وأنا مش هفضل أقوم بدور المذيع كتير .... إنت اللي بعد شويه هيكون معاك المايك ...

قولي بقى بتعرف تعترف بعيوبك؟

طبعا هترد عليا وتقولي هو حد بيعرف يحدد عيوبه؟

لكن أنا مقولتلكش تحدد! أنا بقولك تعترف! لإن كلنا عارفين عيوبنا كويس بس في منا اللي بيقدر يعترف بوجودها علشان يغيرها ... وفي منا اللي بيداري كأنه ملاك نازل من السما بدون عيوب!

ماعلينا... أنا هحاول أساعدك

بتحب تتكلم عن نفسك كتير ... وإنك الواد الفتك اللي فاهم كل حاجه!

بتحب تبقى محور اهتمام الشلة دايما؟

بتحس إنك محبوب؟

هترد عليا وتقولي أنا بحكي قصة كفاحي ؟

طيب  حد طلب منك تحكيها؟! ولا إنت بتحكي بمناسبه ومن غير مناسبه؟!

مش عارف ترد .. صح ؟!

عموما خلينا في موضوعنا ... ولما أخلص الحلقه إبقى أقعد مع نفسك ... وإسألها كل الأسئله اللي أنا سألتهالك النهارده ...

المهم نرجع لموضوعنا ... إيه عيوبك؟

أنا عيبي إني طيب !

لا والنبي ... وناقص تقولي من أهم مميزاتي الفهلوه ... ومش واخد بالك إنه كذب وتحوير!

هساعدك....

بتكذب ! بتتفاخر بنفسك! غامض! أهبل! بتخاف من الموجه! متردد! متشائم!

طيب عندك القدره إنك تتحكم في الصفات السيئه !

طيب إنت عارف إن كل ما قدرتك قلت في التحكم في صفاتك السيئه وزادت الصفات السيئه جواك كلما قلت الصفات الكويسه اللي عندك قدام الناس .... هقولك إزاي .... يعني لو خليت صفه الكذب جواك تزيد .... ثقة الناس فيك هتقل

كل ماحبك لنفسك وتفاخرك بيها الغير مبرر يزيد ... إهتمام الناس بكلامك هيقل

كل ما غموضك هيزيد ... درجه تفاعل الناس معاك هيقل

كل ما هبلك هيزيد ... درجه احترام الناس ليك هيقل

كل ما درجه مواجهتك هتقل ... كل ماهجوم الناس ليك هيزيد

كل ما تشائمك بيزيد ... درجه إقبال الناس علي الكلام معاك هيقل علشان ميخدوش طاقه سلبيه منك

إيه ... هتعمل إيه ... ما أنت مش عايش في الدنيا لوحدك ...دلوقتي أنا خلصت كلامي ... جه دورك تقعد مع نفسك وتشوف عيوبك بكل صراحه وتوعد نفسك إنك هتتحكم فيها لإنك تستاهل تغير حياتك للأحسن ... وتكون إنسان راضي عن نفسه

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى