الارشيف / بداية نجاح

إعادة حلقات غير حياتك مع رضوى إبراهيم - الموسم الأول - الحلقة الثامنه... قرر وضع زرار حذف الصفات السيئه جواك وإستبدالها بالصفات الكويسه!

Sponsored Links

الحلقة الثامنه... قرر وضع زرار حذف الصفات السيئه جواك وإستبدالها بالصفات الكويسه!

خلاص يا بطل من النهارده ... مش هقعد أسألك وأقولك إنت شايف نفسك إزاي ... طيب الناس شايفينك إزاي؟!

Sponsored Links

من الحلقه دي إبتدينا ندخل في الجد... وهنعمل إحلال وتجديد لكل صفه سيئه ... أو عاده غير منطقيه عندك ... من أبسطها لأكبرها...

ماتيجي نبتدي!!!

ساعات بتسأل نفسك ... هي ليه الناس بتعمل معايا كده ؟! لكن طبعا إحنا مش بنتكلم عن الناس اللي طبعها فيه شر أو مؤذيه ... إحنا بنتكلم علي الناس العاديه ...

ساعات بتحس إن الناس بتبعد عنك !

أو بتتجنبك!

مش بتصدقك!

مبتخدش كلامك علي محمل الجد!

بتتعصب عليك!

لما بتخش أي حوار حتي لو إنت صاحب حق ... بتطلع دايما إنت الخسران ... ومحروق دمك!

أول عيب النهارده هنتكلم فيه ... وبعدين هنشيله من جذوره ونحط مكانه الصفه المضاده ليه ...

العيب هو ... هل أنت من الناس اللي بتهول الأمور... بمعني ... بتحب تعمل من الحبة قبة؟!

أكيد طبعا هترد عليا وش وتقولي... لأ طبعا أنا مش كدا... ياعمي ... دا معظم الناس بيقولوا عليك كده ... وبعدين إحنا قاعدنا سبعه حلقات نهري مع سيادتك ... وإنت وعدتنا إنك هتكون صريح لأبعد الحدود....

إهدى كده ... وإعرف إني عايزه مصلحتك... وإنك لو محاولتش تكون صريح مع نفسك ... هتتعب في حياتك أوي ... لإنك ببساطه هتوه منك !

مش هتلاقيك... وبعد شويه ... هتضيع للأبد...

علي فكره أنا مش بحبطك ... خالص ... أنا بس بحاول أنور لك الصوره علشان تعرف تشوفها بوضوح ...

أيوه تعجبني كده يلا بينا نبدأ ...

إنت من النوع اللي بتكبر المواضيع وتعمل من الحبة قبة؟!

مش عارف!

لكن أغلب الناس وأقربهم ليك ... بيقولوا عليك إنك بتهول المواضيع ... وممكن موضوع صغير جدا يتحل في كلمه ونص ... إنت تعمل عليه حكايه إسبوع؟!

طيب مش يمكن الموضوع كبير أصلا وهما اللي مش فاهمين؟!

معقول يا عمنا أهلك ... إخواتك ... زمايلك في الشغل ... أصحابك ... جيرانك ... كلهم شايفينك إنسان مبالغ فيه وإنت اللي شايف العكس؟! ما علينا ... خلينا نكمل حلقتنا

إنت مثلا لو حد من أصحابك إتأخر عليك شويه بتعمل إيه ؟!

  • بزعل جدا طبعا ... وممكن أخد تاكسي وأروح

يعني بتعملها زعله!

  • أه طبعا

طيب لو حد من أصحابك قالك علي مشكله مضيقاه ... بتهديه ؟

  • أه طبعا مش صاحبي!

بتهديه إزاي؟!

  • بتنرفز علي نرفزته !

ههههههههه قول والله يعني بتزود حجم الطاقه السلبيه عنده بدل ما تحسسه أن المشكله بسيطه!

يعني أنت يا كبير ... لو حصلك أي مشكله حتي لو بسيطه بتقلب يومك ويوم اللي حواليك عادي جدا!

وكمان يا برنس ... مبتلتمس الأعذار لغيرك وبتهول المواضيع ... وتعملها مشكله!

ولسه ياريس ... دا الطبع ده إتملك منك ... لدرجه إنك بقيت حاسس إنه مش عيب!

طيب تيجي أسألك سؤال بأمانه وتجاوبني؟!

إنت بتتخانق كل يوم مع أي حد؟!

  • مممم

ياعم رد متقوليش مممم

  • أه بيحصل

طيب وبأمانه ردود أفعال الناس معاك بتتغير عن أول ما عرفتهم؟!

  • إيه؟!

من غير إيه؟! لخص و رد

  • أه

إزاي يا كبير

  • بقوا بيخرجوا من حياتي ... أو ألقاهم يقولوا لي بطل نكد بقى حرام عليك

أوبا...

طيب ولسه بتنكد عليهم؟!

  • أنا مش بنكد ؟!

أوقولك أنا بقى إيه اللي بيحصل ... إنت بتكبر المواضيع وبتعمل من الحبة قبة ودا ناتج عن خلل معين في حياتك من وأنت صغير هنعرفه الحلقات الجايه ... تقوم بقى لما تهول المواضيع وتكبرها وتنكد علي نفسك وغيرك ... والانسان بطبيعته مجموعه إنفعالات مرسلة ومستقبلة والعكس ... الطرف الأخر في الاول بيحاول أنه يرضيك ويفهمك ... بعدها بشويه مره يطنش ومره يقفش ... بعدها بشويه هيقفش أكتر ما بيطنش ... بعدها بشويه هيهرب من النكد .. لان طبيعة النفس البشريه السوية ما بتحبش النكد ... أوم أنت تعمل إيه ما الناس المقربه بعدت... تبتدي في مرحله الاستقطاب ... واللي هي في أغلب الأحيان بتكون عن طريق المرض ... إنت مش بتحس أنك بتمثل ... خالص أنت بتحس أنك بتستنجد ... أنا عيان ... أنا في المستشفي ... أنا مخنوق

طيب هو دا ينفع... متنحلش كدا ...

أقولك لف وارجع تاني وشيل الطبع ده لانه هيتعبك وهيتعب اللي حواليك وهيبعدهم عنك ... وفجأه ممكن تلاقي نفسك لوحدك ... ومافيش حد بيعرف يعيش لوحده... والبداية هتكون إن قبل أي فعل أو رد فعل هيصدر منك تفكر فيه كويس ... وحط قدامك دايما ( أنا عايز أغير حياتي – عايز أحبني والناس كمان تحبني )

إيه نويت تغير الطبع ده علشان خاطر نفسك قبل غيرك !

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى