الارشيف / بداية نجاح

إعادة حلقات - غير حياتك مع رضوى ابراهيم .. الموسم الأول .. الحلقة العاشره- الصمت أفضل أحيانا(لأ)هو أفضل دائما (دى وجهة نظرك طبعاً)

في الحلقه اللي فاتت إتكلمنا ... إنك ممكن تكون بتدور وبتسأل نفسك دايما ليه الطرف الأخر مش مريحني ؟!!!

ونسيت تسأل نفسك إن ممكن تكون إنت شخصيا إنسان مش مريح بالنسبة لغيرك!

Sponsored Links

 

أكيد بقى في وسط زحمة الإنتقاد اللي بتوجهها للطرف الأخر ... أكيد في مره من المرات الطرف الأخر ده إنفجر في وشك ... وقالك ياعم إرحمني بقى إنت خنقتني ... إنت إيه مش بتشوف نفسك؟!

وطبعا سيادتك إتصدمت ... ومش بعيد تكون رديت وقولت بكل نرفزه ... بعد كل اللي عملته علشانك يكون ده رد فعلك؟! معلش أنا عمري ماهندم علي أي خير عملته حتي لو الطرف التاني طلع ميستاهلش!

وأكيد طبعا في أغلب الأوقات بتخسر الأخر!

بتبعد ! بتكتئب! بتحزن! وبتفضل الصمت!!!!

بتقول لنفسك كلام كتير ... خير الرد علي السفهاء الصمت!

الصمت أحسن الطرق للرد علي الناس ناكره الجميل!

بتعيش بقى في جو الصمت الظاهري يامعلم... بس من جواك بتغلي... بيكون جواك صراع داخلي صعب ... غليان!

بركان!

بيوصل بينك وبين نفسك لكره ... بس إنت طبعا بتبين قدام الناس إنك عمرك ما كرهت حد مهما بلغت الاساءه!

وإنك حد نقي جدا ... وهتفضل حد كويس مهما حصل ...

في إيه ياعم إهدى علي نفسك شويه ... وتعالى نتكلم بالعقل ... إيه جاهز تسمعني؟!

حلو الكلام ... بص ياسيدي ... معظم الناس في مجتمعاتنا ... بيكونوا حافظين مش فاهمين ... إهدى متزعلش ... أنا قصدي إننا بنورث عادات وتقاليد بتأثر فينا وعلي عقولنا ... بتشد سكينه الكهربا اللي بتنور عقولنا وتخلينا نفكر .... إتعودنا إننا منفكرش ... إتعودنا إننا صح طول الوقت... إتعودنا إننا فاهمين كفايه... إلا من رحم ربي طبعاً...

هفهمك أكتر... بس بشرط تسمعني بقلبك وتشغل معايا عقلك ...

إنت طول الوقت شايف عيوب اللي قدامك بس ... وعامل نفسك نظرك ضعيف عن مميزات غيرك ... والعكس بالنسبه لنفسك ... شايف طول الوقت مميزاتك ... ونظرك منعدم عن عيوبك!

دي أول غلطه بتعملها!

بعد بقى لما بتقع في الغلط الحقيقي وهو محاوله الإنتقاد الدائم للأخر ... ويبتدي يتوجد خلاف غالباً بأسباب هايفه ... اللي بينتهي غالبا ... بكره وعداء بين الأطراف ... تقوم إنت تكتئب وتعالج الغلط بغلط ... وتبعد ... وتلتزم الصمت الظاهري... ده غير إن سيادتك بتحول ودنك كمان لصندوق زباله كل واحد معدي عايز يشعلل المشكله يرمي فيها أي كلام ملهوش أي تلاتين لازمه!

إنت غلط ! أه والله متتفاجئش إنت غلط!

دايما حاول تعرف نفسك ... عيوبك مميزاتك ... بلاش التقدير الزايد للذات من غير طبعا ما تحس!

حاول كمان بدل ما تلتزم الصمت ... لا ... خليك شجاع ... وإسمع الأخر كويس... ورد عليه من غير عصبيه!

أوجد لغه حوار بينك وبين الأخر ... لان من غير حوار الدنيا بتبوظ!

واجه نفسك ... علي فكره مش عيب!

خلي عندك سلام داخلي جواك .... والسلام الداخلي عمره ما هيتوجد من غير مصارحه مع نفسك!

طيب عمرك بذمتك شفت حد عنده سلام داخلي بيتعصب بهبل علي الهايفه والصعبه!

طيب عمرك بذمتك شوفت حد عنده سلام داخلي بيكره!

طيب بذمتك في حد عنده سلام داخلي بيخاف يواجه!

طيب بذمتك في حد عنده سلام داخلي بيسمح لاصحاب النفوس الضعيفه يعتبروه عباره عن صندوق زباله يرموا فيه كلام ملوش أي تلاتين لازمة يقومه علي غيره ويخسر الناس ...

راجع نفسك في الاخر عايزه أقولك حاجه لو إنت في الدنيا وحيد ملكش أحباب حاول علي الأقل ما يكنش ليك أعداء....

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى