الارشيف / بداية نجاح

إعادة حلقات - غير حياتك مع رضوى ابراهيم .. الموسم الأول ... غير حياتك مع رضوى إبراهيم ... الحلقة الخامسة عشر - (في كل مرحلة في حياتك بيكون معاك ناس مش لازم يفضلوا معاك وإنت داخل مرحله جديدة مش هيفضل معاك غير اللي بيحبك بجد)

Sponsored Links

الحلقة اللي فاتت إتكلمنا عن :

 

عارفه إنك أكيد في رحلتك اللي فاتت غلطت غلطات في منها اللي سهل وفي منها اللي نص وفي منها اللي كان أو وداك في داهيه بس ربنا سترها عليك بأقل الخساير ... حسيت في وقت من الأوقات أن الحياة وقفت ... بس إكتشفت بعد شوية إنك إنت اللي وقفت ... لكن الحياة ماشية عادي جدا ... وإنت بس اللي إتأثرت ووقفت حياتك علي الفاضي ..وقولنا كمان إن  الانسان تاريخ مش جغرافيا...وكمان إن فيه فرق بين إنك تغلط غلطة ... وإن حياتك كلها تكون عبارة عن غلطة ...

Sponsored Links

وقولنا أن حياتك تستاهل إنك تحارب علشانها !

وكل ما فرص النجاح زادت ... قلت فرص الغلط

في حلقة النهارده هنتكلم وإنت داخل علي حياة جديده مش كل اللي حواليك هيعجبهم الكلام دا ... ماهو صوابعك مش زيك بعضها... ومش كل اللي كان حبيبك هيكون حبيبك فعلا ويتمنالك الخير ... فيه ناس عايزاك زي ما إنت كدا محلك سر .... وفيه ناس عايزينك تنزل درجتين ، تلاته , عشرة ... هتلاقي وإنت بتبتدي مرحله جديده ناس في دايرة حياتك عماله تقع من دايرتك ... وناس بتقع من نظرك ... وناس هتلتزم الصمت هتتفرج عليك هتقع ولا هتكمل ... أوعي تزعل وتتراجع عن قرارك إنك تغير حياتك ... إعرف أنه مش هيكمل معاك غير اللي بيحبك بجد... ولو مفضلش معاك حد ... كمل ... أيوة كمل أوعى تقف ... علشان في المرحلة الجديده لما تغير حياتك بجد هتلاقي فيها ناس شبهك وهتبقي في ضهرك ... وحتي ياسيدي لو ربنا ما أردش كفاية إنك بتغير حياتك إنت .. بتكبر نفسك إنت ... عايز تبقي إنسان صح ... خليك عامل زي القطر ما بيقفش علشان حد ولما بيقف في محطه بيبقى علشان ينزل ناس ويطلع ناس تانية تكمل معاه

أوعي تخلي مفتاح سعادتك في جيب غيرك ... أو حتي حد يرسم ليك حياتك عايزها إزاي ؟!

وتبقى تابع وملكش شخصية , تايه ...

عايز تبقى كدا علشان شوية بشر زيهم زيك ... لا هما الحقيقه مش زيهم زيك ... هما أفضل ... لانهم معاهم مفتاح سعادتك

خلاصة الكلام علشان مطولش ومنكدش عليك أكتر من كدا ... أنا بوضح لك الصورة ... وإنك مش في المدينه الفاضله وزي ما في الشيطان اللي إحنا عارفينه فيه كمان شياطين الإنس ودول أخطر بكتير من الشيطان إياه... بس عيب عليك إنت أسد وإخترت طريقك وإخترت إنك تغير حياتك إنت ... عايزاك بقى تحط قدامك إن ربنا جنبك دايما طول ما إنت عايز تغير حياتك للأفضل ... وياريت تفكر مع نفسك شوية إيه لازمة أن يكون فيه ناس كتير حواليك ومش بيتمنولك الخير ... عارف إنك هتقولي إن الجنه من غير ناس ما تنداس ... بس برضه خد بالك إن الجنه مفيهاش كره ولا حقد ولا حسد ولا أذيه....

بمعني مافيش حد هيحول حياتك إلى جنه غير نفسك والناس اللي بتحبك بجد ودا بالنسبه ليك مكسب مش ضرر  ومحدش هيشجعك علي الغلط غير اللي عايز ضررك وعايزك تجر خيبتك وراك ...

لكن اللي بيبحبك هيساعدك إن تبقى إنسان كويس وتغير حياتك بجد 

ادعمنا بالاعجاب بصفحتنا على الفيسبوك

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى