الارشيف / بداية نجاح

إعادة حلقات - غير حياتك مع رضوى ابراهيم .. الموسم الأول ... الحلقة السادسة عشر .... البرشطة وحشة مافيش كلام

في الحلقة اللي فاتت إتكلمنا عن .. وإنت داخل علي حياة جديده مش كل اللي حواليك هيعجبهم الكلام دا ... ومش كل اللي كان حبيبك هيكون حبيبك فعلا ويتمنالك الخير ... فيه ناس عايزاك زي ما إنت كدا محلك سر .... وفيه ناس عايزينك تنزل درجتين ، تلاته , عشرة ... هتلاقي وإنت بتبتدي مرحله جديده ناس في دايرة حياتك عماله تقع من دايرتك ... وناس بتقع من نظرك ... وناس هتلتزم الصمت هتتفرج عليك هتقع ولا هتكمل ... وإعرف إنه مش هيكمل معاك غير اللي بيحبك بجد...   

أوعي تخلي مفتاح سعادتك في جيب غيرك ...

Sponsored Links

وتحط قدامك إن ربنا جنبك دايما طول ما إنت عايز تغير حياتك للأفضل ...

حلقتنا النهارده عن البرشطه!!! عارفها ؟!

تبقي عارفها...

الناس بطبيعتها ما بتحبش حد يبرشط عليها.... رغم إنهم ممكن يكونوا هما هما الناس اللي بتبرشط علي غيرها...

إلا قولي أنت بتبرشط ؟!

سكت يعني!

هوضح لك ... يعني إنت من الناس اللي مثلا عايزه تسافر بره تقوم ما تسعاش لدي ... لكن ... تروح عند أي حد تعرفه مسافر بره وتبتدي تبرشط عليه ... تدخله علي الفيس بوك ....

حبيبي يا أبو حميد والله والله والله ليك وحشه ... أأأأأيه أيام والله ... فاكر لما كنا بناكل في طبق واحد ... أهو أخوك دلوقتي عشمان فيك وعايز يسافر معاك وتشوف له شغلانه حلوه كدا بدل الفقر اللي الواحد فيه

لو رد أبو حميد عليك بقي بالحقيقه المره وقالك والله يا خويا كان بودي ... لكن الشغل هنا مش بيتلقى كدا وأنا فعلا مش في ايدي أساعدك

أخص عليك يا محمد وهو دا العشم ؟! أخوك قصدك في خدمة

.. طيب هقولك أنا أعملك زياره وإنت تيجي تدور علي شغل

هاجي أقعد عندك يعني؟!

عندي فين أنا قاعد مع أربعه في أوضه

ماشي يا محمد متشكرين أوي

وتفضل مقموص أن محدش بيقف جنب حد والناس إتغيرت والفلوس بتغير النفوس ... من غير ما تقدر ظروف اللي قدامك

وتقوم فاتح الفيس بوك تدور علي أي حد كاتب أنه بيشتغل في بلاد بره

و لو بنت ترسم عليها الحب علشان تسافر وتقب بقى علي وش الدنيا

ولو ولد تضرب صحبيه معاه يمكن يعرف يسفرك

ولو مش عايز تسافر وبتدور علي شغل ... يافلان متعرفش تعيني في الحته الفلانيه ... أو لو عرفت أن فلان الفلاني بيشتغل أو له معارف في المكان الفلاني

 

والله أنا حبيتك من أول نظره دا أنت أخويا ... وإنت أساساً لسه عارفه... ولو خدمك خلاص بقي يامعلم فكك منه وممكن تنساه

ولو مخدمكش يبقى ابن ستين في سبعين

طيب وأنت ماشي في الدنيا كدا وعمال تبرشط علي دا ودا وبره وجوه ... تخيل أنك نسيت تكتشف امكانيات نفسك؟!

نسيت تجرب يمكن تنجح

نسيت تعمل اللي عليك والباقي علي ربنا هيسهلك الصعب وكمان هيسير أمورك سواء في شكل تيسير مباشر واضح أو غير مباشر

طيب حطيت نفسك مكان الشخص اللي بتبرشط عليه وحسيت ممكن تكون ظروفه إيه ... أو تجرب إحساسه وإنت لازق فيه زي الاتب علشان ينفذ طلبك اللي ممكن ميكونش في إيده ينفذه؟!

طيب سألت نفسك أن ليه أسهل حاجه عندي إني أتوكل علي غيري بدل ما أتوكل علي ربنا ونفسي؟!

طيب أنا مؤهل ؟!

طيب أنا عايز ايه؟!

في رحلة "غير حياتك " اللي إحنا المفروض ماشين فيها بقلنا 15 حلقة ... لازم تكنس كل العادات السيئه سواء كانت صغيره أو كبيره ... والبرشطه دي من العادات السيئه اللي ممكن تنكرها فيك وتترجمها أن الناس لبعضها

معاك الناس لبعضها ... بس لما تحاول تعتمد علي نفسك بجد ساعتها لو حد عايز يساعدك هيكون دا من تيسير ربنا المباشر ليك

خليك متوكل مش متواكل

كلامي ضايقك ؟!

معلش لكن أنا وعدتك إني أكون أمينه معاك وأنت في رحلة التغيير ... وأوضح لك صورتك في الدنيا فين ... والناس شايفينك إزاي

وأنت شايف نفسك إزاي والمفروض تكون إزاي

لكن صدقني أول متوصل لبر الأمان هتشكرني لإنك هتحس إنك أتولدت من جديد

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى