مين اللي غلا الليمون ؟ شعر / أشرف ناجي

0 تعليق 141 ارسل طباعة تبليغ


"اطلع من نقرة 
أقع في دحديره"
وبحاول أهرب .. من كلاب السكك
و الشوك اللي مزروع في القلوب 
يا صبر أيووووب ..
نفسي أتوب من عشق الوطن
وبرغم يأسي بحاول اتعكز وأمشي 
مش لا قي سكة تاخدني لعنيكي
كل السكك متقفله في وشي
وسهرت اناديكي .. لما صوتي اتنبح
وبحاول اقنع نفسي بالمكتوب 
انا ال كاره غربتي فيكي
النيل بينكر ميته ف جوفي
ماشي كما المجنون .. 
بتوارى من خوفي
وسابقت ضلي وخطوتي تايهه
حتى الكلام في لساني جف
فوق السكك .. متبعتره حروفي
وانتِ اللي لسه في برجك العالي
ما تبصي وتشوفي
مشدود .. ونفسي في كأس 
لمون ساقع ..... 
كاس الليمون غالي
وبغالب النرفزة .. وشدة الأعصاب 
وتهيج القولون
مين اللي غلا الليمون
بالفقر أوحى لي
الحالة جيم يا وطن 
ولا همه إيه حالي
وبقينا حاله ف سكة التايهين 
واحنا اللي بنحارب
الفقر ويا الغلا .. ومن المرار شاربين
ويعشمونا .. الحال حيتعدل
معلش نصبر ونستحمل و نتبهدل 
ونغالب الموج لحد الريح ما يوارب
خلونا حقل تجارب للفشل كله
بإيدينا نجني الرطب .. فبياكلوا ويحلو
ويوم نعارض يقول لك ..الوطن له كبير .. 
كفياكو عد اللمون .. مع بعض تتسلوا 
دا مكاناكو قعر البير .. يا حبايب اندلوا

.

Sponsored Links

0 تعليق