قرطاس لب .... قصيدة للشاعر: سيد منيرعطيه

0 تعليق 42 ارسل طباعة تبليغ

البحر دموع مجاريح زيي
والبر غريق
والناس تماسيح
كام ألف عيون عاشقه التجريح
كام ألف لسان خنجر مسموم
السما مليانه مطر وغيوم
بتصب ف عيني دموع أنهار
أنا واقف منظر مش أكتر
إنما جوّايا أكيد ب انهار
باتمرجح ف حواري المشوار
وجبال التلج محاوطاني
البرد استحلف يصاحبني
والحزن خلاص بقى عنواني
أخرج من حزن يادوب ثانيه
ف التانيه بيلحقني التاني
وما زلت من الدنيا ب اعاني
أتبعتر ف طريق الأوهام
وشوارع ناس معجونه بغش
أشربلي كاسين من غدر الناس
أسكر وما افوقش
كام ألف صديق فجأه اتغيّر
كام وش اتغيّر مليون وش
كام صحن عسل
يتحوّل مش
وانا مش ..
باتعلّم م الماضي
ولا ب اعرف اجاري الكدب بكدب
ولا باعرف اقزقز جرح الناس
واعمل م الصاحب قرطاس لب
ولا عمري سلكت طريق اللعب
زي البلياتشو على الحبلين
ولا عمري لبست قناع الزيف
وداريت الغدر ف توب مسكين
ما وقفتش عمري ما بين طريقين
ولا كنت بازوّق ف كلامي
ولا كنت ب ارُص
ولا غاوي وبامسك عصا م النُص
ولا باجرح حتى ولو تلميح
طول عمري ف حالي
ودوغري صريح
ولقيت البحر دموع مجاريح
والبر غريق
والناس تماسيح
والنسمه معاهم تقلب ريح
بتهد جدار قلبي الطيّب
وسهام الغدر اللي رموها
ولا سهم ف يوم عنّي يخيّب
ما لقيتش ف يوم حد قُريّب
يجمع أشلائي اللي اتبدرت
أو حتى يسمّي ويدفنّي
ما لقيتش نهار قُدّام منّي
على كتفي يطبطب قبل ما اموت
ما لقيتش يا دوب غير صوت الأه
سابقاني ترفرف ف الملكوت
ما لقيتش يا دوب غير ورقة توت
تسترني ..
ف عري البني أدمين

Sponsored Links

0 تعليق