الارشيف / ابداع

رسالة إلي الخليل‮ ‬ بن أحمد الفراهيدي .. قصيدة للشاعر / صادق أمين

Sponsored Links

عرفت أن الضحايا جاهلة تتخابث
وأن البراءة تهمة أزلية
الورد‮ ‬يفرح وقلبي بيمارس
لعبة في عز الحزن عرفاها
ح اكسر بأيدي في الهوا المايع
وأجرح بحلمي البعد وأستغفر
علي مهلي جي بتمخطر
لو حد‮ ‬ينده قولي مش بأسمع
لوحد‮ ‬ينده صوتي ماهوش طالع
ح ارفض اغض الطرف ف الشارع
وح أغازل بنات ف القلب خبيتها
زرعاني ف الغناوي البكر ضحكتها
واكتب قصيدة من كذا تفعيله
أقول إن الخليل بن أحمد‮ ‬
عمره ما كان وزّان
أنا روحت أقابله قال لي أنا‮ ‬غلطان
للحزن عالم سحري مادخلتوش
قاعد بيلعب طاولة ع المشاريب
يعرف ف سر اللغة لكنه مش حسّيب
يعرف كلام الغزل
ولا عمره كان حبّيب
كان سيبيويه ما قابلش عم جاهين
ولاخدش جرعة فلسفة من سحر ف الدواوين
ما صاحبش مرة عمي فؤاد حداد
سألت عن قلبي ما كان موجود
واحشني‮ ‬يا فؤاد قاعود‮ ‬
وريحة ضحكتك كورنيش
كباين من كبرياء وشموخ
ولولا الكبرياء ماكان ف قلبك طيش
ولولا أن قلبك داق‮.. ‬مرار الأسئلة ما بقيت
وطن جديد ف الشعر من‮ ‬غير قافيه
الشعر منك جرعة م الأحلام
وجرعتين م السحر‮ ‬
وعشان كده أنا جيت
عيل في كامل هيئته محبوب‮ ‬
علي ضهر سقاله شقاه بنا
ولا كانش‮ ‬غير الجرح ليه مكتوب‮ ‬
وبرغم حزنه للحياة‮ ‬غني
يا بنت‮ ‬ياللي رمشها دباح
الليل بقاله ألف عام مامشاش
ما ارميش سلامي الإ علي الغاليين
واهزم بكيفي لمه الأوباش
من ألف عام‮ ‬
راكب خيول الحلم ووصولي
مرهون بكلمة رسمتها بقولي
ولا جاش صباح ولا عدي ناحيتنا
إحنا اللي عشنا الحياة مع إننا موتنا
خدنا الهوي سكه ولا وصلنا
والحلم كان وقت العذاب مكنه
والشعر كائن من جنون وتمرد
يحمي‮ ‬يسير الجمال في الحجر والورد
أحب الشعرا وأحب إسكندريه في الخريف حاله
يبل روحها الشتا‮  ‬بزقزقه نواته
تبقي الحياة رقصه‮  ‬علي رتم‮ ‬
مستفعلن فاعلاتن مستفعلن مفعول
وألمح في عين الخليل بن أحمد
علامة استفهام‮.‬

 

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى