الارشيف / ثقافة وأدب / ابداع

قصيدة للشاعر المستشار احمد ابو دقة


سألته
انت طبعك إيه
جاوبنى قال 
بنى آدم
ماباعرفشى أمور
العيب
ولاأنطق كلام عادم
وطول عمرى
مسلم للإله أمرى
ولااتعارك ولااتصادم
بدون أسباب
ولاأخطف ولاانتش
ولاهنتش
ولاكنتش
فى يوم كداب
ولاهراب ولاخراب
ولاأعرف أوارب الباب
ولا امشى مع الأمواج
صريح بحبوح
وباب مفتوح
بدون ترباس ولامزلاج
احب الساكنين الكوخ
ولاامسح جوخ
ولاديباج
وكيف الكيف
أقابل ضيف
واقدم خيرى للمحتاج
وللرايح وللقادم
وأتسامر وأتادم
وأتنادم
ماليش فى الوزنة 
لما تميل
ولاتهليل ولاتطبيل
وبالجملة وبالتفصيل
بنى آدم
.......
بنى آدم
بسيط فى كل أحوالى
على مهلى
وعمرى ماقلت يوم
يادنيا تستاهلى
واساعد أى محتاج
لما ينده لى
بنى آدم
وكل الخلق
من أهلى
ولابالعيب جرى لسانى
ولاللسوء فى يوم
تتسمع ودانى
بنى آدم
ودايما للجميع خادم
لأهلي في الحضر
والريف
خفيف كاني
سحابة صيف
تحميهم من القيله
وتعمل ألف ضليله
وكيف كيفي
أقابل الضيف
جدار ورا ضهر 
أي ضعيف
صوابعي في الضلام
شمعه
وإيدي تمسح الدمعة
بدون صنعه
ولا تكليف
ولاحاجز ولا مانع
وتوب ناصع 
وكف نضيف
ولامديون ولاغارم
وصابعي مكانشي يوم
في الشق
في قول الحق 
سيف صارم
وبالجمله وبالتفصيل 
بني ادم
أحمد أبودقه

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى