الارشيف / ثقافة وأدب / ابداع

بعد الفراق قصيدة للشاعرة عبير فوزى

 

أنا روحي بعد الفراق اتفتفتت فتافيت ..

Sponsored Links


نزلت حروف عمري تخطط ع الورق شغابيط ..


طلع الكلام م القلب لكن مُر .. 


لو دقت طعم الكلام .. يصعب عليك حالي.. 


جربت يوم الألم لفراق حبيب غالي ..


جربت طعم الوجع ؟ حسيت بأنّاته ؟ 


جربت مرة النزيف من غير وريد ولا دم ..


تنزف عيونك خوف .. تنزف آهاتك هم ..


جربت لما الآهات تدخل ما تخرجشي .. 


تفضل تغوص جواك تقطع في أوصالك ..


والناس تشوفك جبل قايم بأحمالك ..


وانت الوحيد اللي عارف .. انه مش حالك ..


جربت لما القلب م الخوف يتعصر ..


والفرحة لما تتخنق والحلم لما ينكسر ..


والحفرة جواك لما توْسَع .. والفراغ يبقى كيانك ..


وتحس ان العذاب بيسن في سنانه عشانك ..


وتشوف عينين الزمن شمتان ف أحزانك ..


يسرق سنين عمرك .. ع الأرض يرميها ..


وتدوس عليها الناس .. تتقل خطاويها ..


وتحس انك نسيت .. روحك كمان فيها ..


وتلاقي نفسك خيال .. واقف بتتفرج ..


على السنين اللي راحت وانت ناسيها ..


لا قدرت تملكها ولا حتى تحميها .

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا