الارشيف / ثقافة وأدب / ابداع

بيكي عايش .. للشاعر: سيد منير عطيه

مفتتح


مافيش كائن يعيش بلا روح
ولا مسموح
بروح من غير جسد تنزل
تعيش ع الأرض
وانا وانتي جسد مع روح
طبيعي نعيش نكمّل بعض
وطول م احنا كده عايشين
مُحال نمشي ف طريق الضد
مُحال يا حبيبتي نتفرّق
عشان معنى الفُراق لينا
ح يبقى الموت ...
قصيده
.......
لو بعدتي..
إيه يكون ف الكون فاضلّي
بعد بُعدك ؟
وامّا تيجي وفتحه حضنك
تبقى كل الدنيا ملكي
إوعي ف الأشواق تشُكّي
أو بحور الظن تاخدك
دا اللي سايب قلبه ملكك
مستحيل يا حبيبتي يرضى
تاخده حاجه لغير طريقك
أو يشوف الضي بعدك
واللي سايب روحه عندك
مستحيل رح يبقى عايش
لو يغيب عنّك ثواني
أو تغيبي
حبك المكتوب نصيبي
وارتضيت أدخل دروبك
فاتح الأحضان مودّه
زارع الشرايين جناين
ورده ماسكه ف إيدها ورده
كل شئ حلو النهارده
بس حلو عشان وجودك
ياللي وردي من ورودك
الربيع ف عينيكي فتّح
خلّي باب القلب يفتح
ضلفتين على جنّه واسعه
سيبي قلبي يطوف ويسعى
جوّه شرايينك غرام
صدّقيني يا حبيبتي
لو حبسنا الشوق حرام
سيبي قلبي يصلّي فيكي
وانتي تبقيلُه الإمام
بس إوعي ف يوم تحاولي
تهربي من حضن قلبي
واوعي لحظه تشكّي إنّي
بيكي عايش
وانتي برضه بيّا عايشه
د الغريق محتاج لقشّه
بيها يعمل طوق نجاه
يبقى ليه والشوق سفينه
نرضى نكسرها بإيدينا
فوق صخور بحر الحياه ؟
د الغرام مفتوح مداه
يبقى سيبي قلوبنا تفرد
ف الهوا جناحين غرامها
واما نتعب ..
أي عش ف أي شجره
يبقى بيتنا

Sponsored Links

............................................
من ديوان (قلبي مجرم)

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى