الارشيف / حاجات تانيه

رمضانك.. 7 علامات مميزة لمسلسل "الحلال".. "حرام إنك متشوفوش"!

اسرار الاسبوع .. الثلاثاء 06 يونيو 2017 10:39 مساءً ...  

بقلم: أنور الوراقي

Sponsored Links

وفى رمضان يحلى الكلام عن الدراما والمسلسلات، وبرامج المقالب.. علشان كدة مش هنكسر القاعدة، لكن هنبُص لها من زوايا مختلفة شوية!

1-   طبيعى مسلسل من بطولة (سمية الخشاب) لازم تشوفه، أصلك لو مشوفتش (سمية الخشاب) هتشوف مين يعنى؟ جثث وأنياب كفر دلهاب، واللا (صابرين) وهى طالعة محروقة فى الجماعة 2؟!

2-   بالإضافة لـ(سمسمة) فعندك (يسرا اللوزى) كمان؛ يعنى مسلسل لوز اللوز، وهيفوتك نُص عمرك ـ زى العبد لله ـ لو مشوفتوش، وأهو أنا دلوقتى بكتب وصيتى علشان فاتنى نُص عمرى فعلاً!

3-   على فكرة ممكن برضو تشوف (يسرا اللوزى) فى مسلسل طاقة القدر، لكن هاتبقى لوحدها من غير (سمية).. فالأفضل ليك أكيد إنك تاكل بسبوسة بالقشطة، أحسن ما تاكل القشطة لوحدها مثلاً، أو البسبوسة لوحدها ومعاها بليلة.. قصدى معاها (حمادة هلال)!

4-   عُذرَك الوحيد فى تجاهلك للمسلسل هو إنك تكون زهقت وطهقت من عيشتك بسبب وجود (بيومى فؤاد) فيه، لكن يا أخى حاول تعصُر على نفسَك ليمونة، صدَّقنى الموضوع يستاهل، حتى لو كان كيلو الليمون بـ30 جنيه!

5-   على فكرة.. (دينا فؤاد) كويسة برضو، وأهى أحسن من (بيومى فؤاد) فى كُل الأحوال.. وعلى فكرة برضو وعلى طريقة كابتن (لطيف) الله يرحمه دة تشابه أسماء، والاتنين مش أخوات، طيب بذمتك ودينَك، دى تنفع تبقى أخت دة؟ عموماً لو مش بالعها الليمون موجود فى التلاجة، وفيه نُص واحدة على الرَف فى الباب جنب البيض.. تقدر تستعملها عادى محدش هيحوشَك!

6-   آه بالمناسبة.. واحد جارنا باع التليفزيون أبو 6000 جنيه لبتاع الروبابيكيا بـ20 جنيه لما شاف مشهد لـ(مها أحمد) جنب (سمية الخشاب)، فياريت تاخد حذرك لو كُنت زى جارنا دة، ابقى خلى حَد يرن عليك قبل المشاهد اللى من النوعية دى، أو يرن على بتاع الروبابيكيا يبعد عنَّك الساعة دى!

7-   ونرجع لـ(سمسمة) و(يسور)، ومش هكلمك عن الإضاءة والسيناريو والحوار والإخراج والأداء والكلام الفاضى دة، لكن هكلمك عن شعر (سمية)، وعينين (يسرا)، وقوام (سمية)، وعينين (يسرا)، ودلع (سمية)، وعينين (يسرا).. أما عن الدراما، فدراما إيه يا راجل؟ كبَّر مُخَّك!

اقرأ أيضاً:

* رمضانك.. 7 علامات مميزَّة لمسلسل "الحالة ج".. "مش ج خالص"!

* رمضانك.. 7 علامات مميزَّة لمسلسل "ظل الرئيس".. "الرئيس ساب دقنه واختفى"!

------------------------
الخبر : رمضانك.. 7 علامات مميزة لمسلسل "الحلال".. "حرام إنك متشوفوش"! .. تخلي جريدة اسرار الاسبوع مسئوليتها الكاملة عن محتوي هذا الخبر وانما تقع المسئولية علي الناشر الاصلي للخبر و المصدر هو موقع : الحكاية

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا