الارشيف / حاجات تانيه

ازاي تبقى كوووول؟.. "اقراها قبل ما تسافر الساحل "

Sponsored Links

اسرار الاسبوع .. الجمعة 28 يوليو 2017 11:45 صباحاً ... تداول العشرات مم مستخدمي الانترنت ورواد مواقع التواصل الاجتماعي في الفترة الاخيرة سلسلة من التعليقات الساخرة التي لخصوا بها اسلوب بعض مرتادي الساحل السمالي وطريقتهم في الكلام وجاء في بوست انتشر بكثافة مؤخرا مايلي :

الدنيا اتغيرت اوي اوي اوي وعلشان تبقى "كوول

Sponsored Links

لازم تبقي "in"

 لازم تعرف القواعد و الدنيا ماشية ازايي

الموضوع مش سبهللة كدة ..

شوف يا سيدي مبدئيا لو ساكن او رايح الساحل اعرف ان اي قرية هتروحها او تشتري فيها قبل هاسيندا تبقى مش waoo بما في ذلك مارينا طبعا و لسان الوزرا

معاك من هاسيندا باي وطالع بس اوعى توصل مرسى مطروح اخرك الماظة او سيزر بعد كدة هتبقى دخلت في الخطر تاني ..

و بعدين اللي يعملك الانتيريورز بتاعة البيت واللاندسكيب لازم لازم يبقى كريم ميختيجيان ولا ترضى عنه بديلا  .. اي حد تاني الأيام دي غير كريم هتبقى مش "ان" و هيطلعك معاه "اوت" ..

(لكن  لو قررت انك تكون عندك بيت في اليونان او سايبرس او ساعتها هيبقى ممكن تعمل الانتيريور ديزاين بنفسك و تشتري الفرش من اي حتة ان شالله يارب من قاصد كريم بيومي لأنه يشفعلك انك طلعت برة اصلا فبقيت اوتومايكللي "ان"  )..

دة بالنسبة للبيت ..

بالنسبة للعربية بقى فلازم تبقى يا عالية اوي يا واطية اوي اي حاجة ارتفاعها طبيعي مش هتبقى "إن" خالص يعني يا هامر مثلا او حاجة فور باي فور بس ايه لازم تبقى بنت ايه يعني ماحصلتش .. يا بقى حاجة سبور كدة واطية جدا ايدك تلمس منها الأرض .. ياحبذا لو بورش مثلا او فراري او لومبيرجيني او حاجة كدة يعني ..

اي حاجة هتجيبها ارتفاعها طبيعي هتبقى فلوس بتترمي في الأرض ..

 خلصت البيت والعربية ..

لازم يبقى عندك كلب  مش قطة .

والكلب برضه زي العربية لازم يا يبقى كبير اوي يا صغير اوي اللي هو يعني يا بيجرجرك معاه او اللي هو ممكن تشيله في جيبك يعني أكبر من الفار شوية اي كلب حجمه طبيعي مالوش لازمة خالص اطلاقا مايجبش تعبه وهتبقي out

.. اهم من اخلاق الكلب وتربيته بقى لون الكلب و قصة شعره .. تيك كير أوي من الموضوع دة ولازم طبعا يبقى عنده "الفيت"  بتاعه اللي ممكن تكلمه في اي وقت تستشيره في احوال الكلب  ..

تيجي بعد كدة للأكل مبدئيا بالنسبة للجروسوري بتاعتك لازم لازم لازم تبقى متسجل عند جورميه دة اساسي وبيجيلك منه ماسدجز طول النهار بالبروموشون ايتمز يعني انت والحاج جورميه سون فاسون طول الوقت تليفونات بينكم .. ممكن برضه تكمل مع بترو في شوية حاجات بس ماتزودش اوي يعني ممكن تستمر تجيب الجبن من هناك ..

الأكل عموما لازم تبتدي تاكل حاجات غريبة يعني كلمة فطار الصبح دي انتهت وبقت بلدي جدا ..

لازم تاخد "سموثي" الصبح علشان تبقى "الا مود" ودي حضرتك ممكن تبقى "هيلثي" يعني معلقتين تلاتة شوفان على موزة على كيوي على ناتس على معلقة هوني (عسل ابيض يعني بس مابنقولش عليه عسل ابيض خلاص عيب الكلام دة) كل دة عليه شوية سكيمد ميلك .. اوكي؟ اوكي .. 

ممكن بعد كدة بساعتين تلاتة تاخد سناك او برانش او ساعات اسمها "بايت" ، يعني موضوع انك تتغدى الساعة تلاتة دة بقى حاجة مقرفة وعيب وبلدي اوي .. مافيش حاجة اسمها "هاتغدى"  دلوقتي .. لازم تاخد سناك او برانش وبعدين تاخد ايرلي دينر علطول .. طبعا ماتشربش اي حاجة في الدنيا طول اليوم غير مية او شاي اخضر او ابيض او فلافورد انفيوجين .. اتمرن عليها هتلاقيها سهلة ان-فيو-جن .. سهلة؟ .. اوكي؟ .. اوكي ..

طبعا المية ماتتشربش كدة لازم تملاها حاجات وتبقى ملحوسة .. ماورد؟ لا يااي بلدي اوي يا معلم.. ماورد ايه ؟ انت لسة عايش عصر الماورد؟ الماورد دة دلوقتي حضرتك بيتحط في مية الحمام .. دلوقتي المية بيتحط فيها خيار و نعناع و ليمون ورمان وجزر مبشور  علشان الديتوكس .. دي-توكس .. دي-توكس .. اوكي؟ .. اوكي ..

كفاية كدة بقى النهاردة .. اكملكم بعدين علشان تعبت  ..

نايتي نايتي اسمها دلوقتي .. حتى جود نايت بقت ديموديه  ..

------------------------
الخبر : ازاي تبقى كوووول؟.. "اقراها قبل ما تسافر الساحل " .. تخلي جريدة اسرار الاسبوع مسئوليتها الكاملة عن محتوي هذا الخبر وانما تقع المسئولية علي الناشر الاصلي للخبر و المصدر هو موقع : الحكاية

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا